आज :

ताजा समाचार



हरिप्रसाद ढकाल द्वारा वंशस्थ छन्दमा रचित ‘मन’ शीर्षकको कविता

  पुरुषोत्तम ढकाल    ६ जेष्ठ २०७७, मंगलवार १६:१०      515 Views

हरिप्रसाद ढकाल / चानपा-७, भक्तपुर
कविताको शीर्षक: मन
मनै त हो पूर्ण अपूर्ण यै मन
मनै भए शान्त लिइन्न क्यै धन
पखाल्न धोएर अशुद्धि शुद्ध त
म छैन सक्ने मनदेखि अन्यथा ।१।

हुँदैन मैलो सुकिलो कसैगरे
बनेर लाछी, मन यो कतै गए
पगाल्छ संसार सगोल विश्व यो
छ शक्ति यस्मा दुनियाँ तताउने ।२।
चिसो भएमा यसका अगाडि पो
रहन्न सामर्थ्य कसैगरी अहो
लिएर सातो दुनियाँ उजेल्दछ
बिगार्न चाहे सहजै हुँडल्दछ ।३।
छ एक साथी यसको त चाहना
र मित्र अर्को पनि हो त बाहना
उठेर झोक्का पनि भन्छ मित्र हुँ
खुसी र हाँसो सबमा विचित्र हुँ ।४।
तुरुन्त फेरी यसले त मित्रता
बढाउँदै हात हिँडी जतातता
लगामले कस्न सके त भै गयो
भएर छाडा अनि मात्तिने छ यो ।५।
अनेक साथी यसका यताउति
मिलेर बस्दा थपिने छ है खुसी
भलाइ गर्नैकन सक्षमै बनी
भिजाउँदो हो नरको त जीवनी ।६।
गरेर कामै मन माफिकै पनि
खुसी घटाईकन बित्छ जिन्दगी
कसेर राख्ने मन यो कसोगरी
कुँडिन्छ छाती अब यो त बेसरी ।७।
न मान्छ यस्ले अवरोध त्यो पनि
भए त इच्छा यसको जतापनि
ढलक्क ढल्केर गई दिने यही
अडेर संसार जमाउने यही ।८।
कतै छ यस्को सुखको मुहान त्यो
कहीँ त गर्ने विषको उठान यो
हिँडेर पुग्नै त अगम्य ठाउँमा
पुगी तुरुन्तै घर आउने यहाँ ।९।
अरू निदाएर हुँदा अचेत नै
हुँदैन बेहोस बरू सचेत भै
न भोक लाग्ने न त प्यास नै खडा
थकाइ, अल्छी नभनी बनी घडा ।१०।
झल्याँस्स पारी कहिले जगाउने
सखाप पारी हृदयै डढाउने
मुसुक्क मुस्कान दिएर साथमा
सजाउने नै मन हो त विश्वमा ।११।
न हुन्छ कोही यसका विरुद्धमा
न सक्छ जानै यसदेखि दूरमा
दया र माया धन दौलतै पनि
देखिन्छ तुच्छ मनसामु लौ न नि !१२।
स्रोत: हरिप्रसाद ढकालको फेसबुकबाट साभार 

प्रतिक्रिया दिनुहोस


  • 1

    काभ्रे जिल्लाको पनौती प्रहरी चौकीको आयोजनामा नागरिक सुनुवाई कार्यक्रम सम्पन्न

  • 2

    भारतमा कोरोना संक्रमण दर तीव्र‚ एकै दिन १ लाख ७० हजार संक्रमित थपिए

  • 3

    सवारीसाधनमा जोरबिजोर पद्धति बसाल्न सर्वोच्चको आदेश

  • 4

    प्रहरी निरीक्षक बिष्णु हरी फुँयाल द्वारा भक्तपुरमा साइबर अपराध र सुरक्षा सम्बन्धी स्कुल प्रशिक्षण कार्यक्रम सम्पन्न

  • 5

    काभ्रे जिल्लामा आज थप ३ जनामा कोरोना संक्रमण पुष्टि, २ सय ७३ जनाले लगाए खोप

  • 6

    काभ्रे जिल्लाको नमोबुद्ध काँक्रेको जङ्गलमा हिजो देखि लागेको आगो नियन्त्रण

  • 7

    भारतमा कोरोना संक्रमण ह्वात्तै बढ्यो, दिल्लीमा कडा प्रतिबन्ध घोषणा

  • 8

    आज घोडे जात्रा पर्व मनाइँदै, काठमाडौं उपत्यकामा सार्वजनिक बिदा